Si, è antica.
Dice: - Ma qua' storia?
Dico: - Comme, qua' storia? 'A nosta!
Insiste: - Ma ...'a nosta... 'e chi?
Io: 'A nosta... 'e tutte quante!
Isso: Ma che vuo' dicere? ...'Nverita' nun aggio capito niente!
Risponno: - Comme, nun hé capito?
E ancora: - Aggi' pacienzia... nun aggio capito! 'O ssaie che vuo' fa’?
Cuntammélla tu,'sta storia!
Io: - E vabbuo', ma sta a sèntere buono,però!
Pecche' nun è propio na storia... comme a chelli storie che tèneno nu
cappiello, nu svulgimento e nu finale... pusitivo si è possibile.
No, cca' se parla sulo d' 'o svulgimento,e 'o ssaie pecche'?
Pecche' comm' è accuminciata e comme va a ferni' nun 'o ssaccio e nun
'o ssape nisciuno... e nisciuno mai 'o venarra' a sape'!
Nun sta a sèntere è cchiacchiere!
'Nzomma, sta storia ca te voglio cunta' é 'a vita, 'a vita nosta!
Tante n' hanno parlato e ogneduno ne tène nu penziero, n' idea, che te voglio di' ...per esempio:
Eduardo diceva ca è comme a nu suonno ca t' é
paruto vero e riale finché duorme... e nun 'o puo' cunta' a nisciuno, quanno
te scite, tant' è fatto e niente!
O pure Don Ferdinando Russo che diceva ca ogn' anno che passa è n'ata rappa 'nfaccia, n'ato suonno fernuto,
n'ata fronna caduta, n'ata speranza morta e sutterrata.
O ancora Diego Petriccione che diceva che "tanno, 'a sunata 'e
ll' ora, forse accumencia ' a vita".
Nun e' overo, nun 'e ddà retta! Chi 'e nuie nun ha passato nu guaio, chi nun ha perso nu parente,
n'amico: 'o cchiu caro.
Chi é che nun se va a fa viecchio e chi nun se chiagne 'o tiempo bello:'o tiempo 'e quanno int' é ssere d'esta' 'nzieme a na nnammuratella, 'o viento
frisco le passava ncuollo:o quanno, l'acqua fredda d' 'a vernàta lle cadeva
'ncapo e nun le veneva manco nu poco 'e tosse.
- E allora? Che vo' dicere?
Che mo' che m'arretiro cchiu 'ambressa 'a sera ...ca nun vaco scavezo
pe' sotto a ll'acqua che chiove ... ca na rappa me segna 'a faccia sotto a
quacche capillo janco.... mo' che tengo 'a trent'anne 'a stessa 'nnammurata.
- Che vo' dicere? che 'a vita mia nun è cchiu'
vita?
No ...nun è accussi, pure si 'e vvòte te pare ca 'o munno te cade
ncuollo e pienze ca nun putarràie maie asci' 'a lla' sotto!
No, si 'o core rummane giovane, si ll'uocchie 'e ttiene sempe apierte
ncopp' a' ggente che truove, e ca te passa a fianco.
Si dai sempe n' ata pussibbilita' à vita, a chello che te po' offri' a
chelle che te po' da' ancora.
Si pienze e si cunvinto che ce stanno ancora e
sempe: migliara, miliune 'e cose 'a sape', 'a capi', 'a 'mpara'.
E cchiu' t' 'e 'mpare e cchiu' e vuo' cunta' all'ate... comme sto facenno mo' cu
te Anto', o cumme avimmo fatto io e chilli cumpagni cari d' o' Master l'ata
sera ...cu chillo cuncertino che ato nun vulev'essere che 'a condivisione 'e
n'ammore!
Allora, amico mio, hé capito chello che voglio di'?
Che 'a vita... si nun ce miette l'ammore... nun e vita, ma è morte ...pure si tiente vint' anne!
